Cult之后 朱咪咪
朱咪咪被誉为香港Cult之后。
以最cult的网上字典解释，cult的意思除了崇拜之外，还带有低俗、造作、夸张的意味。
咪咪姐台风独特，再加历年来拍的电视电影，影像深入人心，有这样的「朵」绝对不足为奇。就连我访问前，都以为咪咪姐一定系好「街市」。
事实完全系两回事，打扮朴素的咪咪姐驾benz到五星级酒店做访问，早在九十年代初已经是卡拉OK老板娘，老公在新加坡开寄养学校，还未计接到冇停手的登台骚，贵气绝对系由内而外。
虽然对马来西亚出生，新加坡出道，却在香港「爆红」的咪咪姐来说，同香港最有关系的地方，还是cult爆的砵兰街，同庙街毫无关系，更加未喺榕树头卖过唱。
「我初初到香港就系住砵兰街，喺弥敦道新兴大厦地库嘅爱群歌剧院唱歌，亦喺呢度识我老公。」咪咪姐说。 Cult到闷，所以即将举行的红馆演唱会，讲到明要变身玩grand，回复三十年前，玉女掌门人形象咁话。
cult之后，又如何?
纯情玉女
朱咪咪真名朱月美，乳名叫咪咪，出道后一直以咪咪这个名行走江湖，最初出的唱片都是叫「咪咪」，来港后才变成朱咪咪。
祖籍台山，在马来西亚怡保出世，老窦在怡保以理发为生，养大九个仔女，自小家贫，十三岁就跟唱大戏的二家姐(朱月萍)去新加坡唱歌搵食。
「由怡保出去新加坡唱歌时，纯到直头成嚿饭咁，本来系去读书，不过真系唔系嗰皮，二家姐咪安排我学唱歌登台，第一次上台表演唱〈情人的眼泪〉，紧张到震，一落台就畀家姐『星』一巴，话我唔识望住观众唱歌咩?」
呢一「巴」，让咪咪姐开展她的歌唱生涯。
「当时得十三、四岁，根本就未够秤，咪戴假发扮大个啰，畀人知道真系会拉㗎!」
咪咪姐当时走纯情玉女路线，仲出过六只细碟，不时上电视台做节目，算系当地红歌星。
「点知去到七十年代尾，开始有台湾歌星入侵，人哋识冧老板，我纯过只猪，搞搞吓就开始冇得捞。当年仲试过同政府倾，点样保护本土艺人，当然最后都系冇下文啦!」
七八年咪咪姐廿七岁，事业麻麻，同当时嘅男朋友又唔开心，遇上来香港唱酒廊的机会，于是毅然踏足香江做过江龙。
「屋企人冇理我，十几岁就出来跑江湖，唔会担心我出事。我担心冇得捞就真。」
在新加坡出过六只细碟，来港后更是华纳一姐。七九年华盛顿夜总会嘅宣传广告中，系用「来自星洲的靓女电视红星朱咪咪」嚟形容咪咪姐。
华纳一姐
来港后咪咪姐开始她的酒廊歌手生涯，更是真正的华纳一姐。
华纳一姐乜唔系薛凯琪咩?
「华纳唱片香港第一个签约嘅女歌星就系我，出了一只碟，当时仲唱紧酒廊，住喺砵兰街，贪返工方便。我话你听当年砵兰街其实仲杂过依家好多o架!」
咪咪姐口中的众酒廊夜总会，华盛顿、爱群、翠丽华以至海洋皇宫等，都记载了咪咪姐的风光岁月，也让咪咪变身朱咪咪。
「新加坡人好纯情o架，我都唔知我几时同点解会变成依家咁?不过生活其实同普通人冇分别，都系工作、拍拖、结婚生仔咁啰!」
直到九○年，咪咪姐才遇上人生高峰。
珍贵合照，是咪咪姐(左)和二家姐的唯一童年合照。
「九○年第一次在红馆开骚，就系做尹光嘉宾，初时有人打电话搵我唱红馆，我第一个反应系『你都黐线』，直到真系收到订，至相信竟然会有人搵我唱红馆。当年唱红馆好威o架，小凤姐、许冠杰至开到，边谂到自己有份?」
同年七月，劲受欢迎的咪咪姐已经自己开三场红馆演唱会，由酒廊歌手爆红，当年的她，其实已经三十到尾，仔都两岁。
「本来计好数，等个仔读完幼稚园就收山返新加坡，点知咁样一搞，咪整定留低继续做啰!」
继而签TVB做《欢乐今宵》，拍戏做星爷奶妈，再做埋卡拉OK老板。咪咪姐话当年她开的卡拉OK，是全香港第一间分为小房间的卡拉OK，生意好到做唔切，第二年就已经再开分店。
「我一年之内，做晒其他人一世想做的事，所以九○年对我来讲好重要，第一次唱红馆做嘉宾，到今年刚刚二十周年纪念，所以我点都开番场演唱会唱红馆。」
咪咪姐话人生有几多个廿年?有今日嘅成就，都系够勤力、唔怕蚀底。
「阿爸教落，所有事都要靠自己勤力，所以我从来唔去算命睇掌，有次做节目苏民峰话我仲有排做，我话我退休唔捞啦!点知又系继续做到冇停手。」
司机变老公
咪咪姐口头禅:「乜都系整定嘅!」
七八年第一日到香港，当晚就跟其他歌星去看演唱的场地，司机就是咪咪姐的老公。
「我话整定㗎，一落机就跟去睇场，我着住条超窄身短裙，局住只可以坐前座，咁就识咗我老公喇!」
八○年十二月三十一日注册结婚，咪咪姐话当晚都仲唱紧歌。
本来准备九○年返去，点知一直拖到○○年至由老公同两个仔一齐回去。
「始终读书都系新加坡好!」
咪咪姐与老公马先生结婚三十年，大仔今年廿一岁要当兵，细仔都读紧中五。
咪咪姐三代同堂大合照，为的是庆祝母亲生日。
现时老公在新加坡开家庭式寄养学校，专收东南亚和中国、香港过去读书的年轻人，提供食宿及管理。
大仔今年理工毕业，正准备当兵两年，之后再考大学。
「虽然应该冇仗打，不过都担心，早两年都有两、三个人因为当兵操劳过度猝死，所以我同个仔讲，有乜唔掂就要休息，千祈唔好死顶。」
行足廿年大运，今时今日咪咪姐最紧要就系两个仔，就算工作排山倒海，都要香港、新加坡两边不停走，为的是可以和家人见多几面:「我八年都冇同家人庆祝过中秋节，要做解放军骚。」
所以就算演唱会举行在即，都要扑返去出席大仔的毕业礼，第二日就随即回港准备六月一日举行的演唱会。就连今年母亲节当日，咪咪姐都是在飞机上度过。「有骚做有钱搵，冇理由唔做!」
其实咪咪姐十多年前曾经试过带埋两个宝贝仔一齐出骚。不过，今次演唱会嘉宾就搵咗阮兆祥同王祖蓝。
三十年后
咪咪姐后生时绝对系嗒得杯落， 有晒玉女掌门人风格。
就如网友戏言，三十年前的朱咪咪，就等如是今日的G.E.M.，形神俱似之余，都系咁唱得。
「有个咁嘅女都好呀，可以接我班，退休唔使做。」
回望半生，由咪咪变cult后，或许冥冥中，真系一切都整定。
「做玉女唱酒廊普普通通，人哋唱歌猛收利是，我可以一封都冇。
反而做奶妈扮鬼扮马就大受欢迎，你话唔系整定系乜?」
我相信三十年后，G.E.M.点都唔会变成邓咪咪，咪咪姐绝对是只此一家。
所以我都系最钟意咪咪姐呢条史上最烂IQ题:
问:点解朱咪咪个头唔梳得?
咁都唔识答?
咪咪姐话:「你返去读幼稚园啦!」
答案:因为是「不能『梳』的『咪咪』」(用普通话讲)。
